Maddə 1. Ümumi müddəalar

1.1. Bu sənəd Forest Education Azerbaijan fəaliyyətlərində iştirak edən bütün uşaqlar – ləpirçilər üçün davranış qaydalarını və etik prinsipləri müəyyən edir.
1.2. Qaydaların məqsədi təhlükəsiz, hörmətə əsaslanan, öyrədici və inklüziv mühit yaratmaq, ləpirçilərin həm fərdi, həm də qrup halında sağlam inkişafını dəstəkləməkdir.
1.3. Bu qaydalar həftəlik və aylıq görüşlərə, açıq hava fəaliyyətlərinə, park və istirahət məkanlarına, eləcə də düşərgə proqramlarına şamil olunur.

Maddə 2. Ləpirçinin məsuliyyəti

2.1. Hər bir ləpirçi Forest Education fəaliyyətlərində iştirak edərkən öz davranışına görə məsuliyyət daşıyır.
2.2. Ləpirçi həm öz təhlükəsizliyini, həm də digər ləpirçilərin və böyüklərin təhlükəsizliyini nəzərə almalıdır.
2.3. Öyrədənlərin verdiyi izah və göstərişlərə diqqətlə qulaq asmaq və onlara əməl etmək ləpirçinin əsas öhdəliklərindəndir.

Maddə 3. Hörmət və əməkdaşlıq

3.1. Ləpirçilər bir-birinə, öyrədənlərə və digər böyüklərə qarşı hörmətli və mehriban davranmalıdır.
3.2. Heç bir ləpirçi başqasını fiziki, emosional və ya sözlə incitməməlidir.
3.3. Fikir ayrılığı yarandıqda zorakılığa deyil, dialoqa və anlaşmaya üstünlük verilməlidir.
3.4. Qrup fəaliyyətlərində əməkdaşlıq, paylaşma və bir-birinə dəstək əsas dəyər kimi qəbul edilir.

Maddə 4. Təbiətə münasibət

4.1. Təbiət Forest Education üçün əsas öyrənmə mühitidir və hər bir ləpirçi ona hörmətlə yanaşmalıdır.
4.2. Bitkilərə, heyvanlara, həşəratlara və onların yaşayış mühitinə zərər vermək qadağandır.
4.3. “İz buraxmamaq” prinsipi əsas götürülür: zibil atmamaq, təbiətdə tapılan əşyaları məqsədsiz şəkildə dağıtmamaq.
4.4. Ləpirçilər təbiəti yalnız istifadə olunan resurs deyil, qorunmalı bir dəyər kimi qəbul etməyi öyrənirlər.

Maddə 5. Təhlükəsiz davranış

5.1. Ləpirçilər fəaliyyət zamanı müəyyən edilmiş sərhədlərdən kənara çıxmamalıdır.
5.2. Alətlər, od, ip və digər materiallar yalnız öyrədənlərin izah və nəzarəti altında istifadə olunur.
5.3. Riskli davranışlardan çəkinmək, təhlükə hiss edildikdə dərhal öyrədənə məlumat vermək ləpirçinin borcudur.
5.4. Qaçmaq, itələmək və təhlükəli oyunlar yalnız icazə verilmiş hallarda və qaydalara uyğun şəkildə həyata keçirilə bilər.

Maddə 6. Dürüstlük və ədalət

6.1. Ləpirçilər fəaliyyətlərdə dürüst olmalı, etdikləri hərəkətə görə məsuliyyət daşımalıdırlar.
6.2. Başqasının əməyini mənimsəmək, yalan məlumat vermək və qaydaları bilərəkdən pozmaq yolverilməzdir.
6.3. Səhv etdikdə bunu etiraf etmək və nəticələrini qəbul etmək öyrənmə prosesinin bir hissəsi kimi dəyərləndirilir.

Maddə 7. İnklüzivlik və bərabərlik

7.1. Forest Education Azerbaijan-da hər bir ləpirçi bərabər hüquqlara malikdir.
7.2. Yaş, cins, fiziki və ya psixoloji xüsusiyyətlərə görə ayrı-seçkilik qadağandır.
7.3. Fərqliliklərə hörmət göstərmək və başqalarının imkanlarını nəzərə almaq etik davranışın əsas tərkib hissəsidir.

Maddə 8. Öyrənməyə münasibət

8.1. Ləpirçilər öyrənmə prosesində fəal iştirak etməyə təşviq olunurlar.
8.2. Sual vermək, sınamaq, səhv etmək və yenidən cəhd etmək öyrənmənin təbii hissəsi kimi qəbul edilir.
8.3. Hər bir ləpirçi öz bacarıqlarını inkişaf etdirməyə və yeni təcrübələrə açıq olmalıdır.

Maddə 9. Ləpirçinin etik prinsipləri

9.1. Mən mehriban və hörmətli davranacağam.
9.2. Mən özümə, başqalarına və təbiətə zərər verməyəcəyəm.
9.3. Mən dürüst olacağam və səhvlərimə görə məsuliyyət daşıyacağam.
9.4. Mən öyrədənləri dinləyəcək və qaydalara əməl edəcəyəm.
9.5. Mən komanda ruhu ilə hərəkət edəcək və başqalarına kömək edəcəyəm.

Maddə 10. Yekun müddəalar

10.1. Bu Davranış Qaydaları və Etik Prinsiplər Forest Education Azerbaijan fəaliyyətlərində iştirak edən bütün ləpirçilər üçün məcburidir.
10.2. Qaydaların məqsədi cəzalandırmaq deyil, ləpirçilərdə məsuliyyətli davranış, qarşılıqlı hörmət və sağlam dəyərlər formalaşdırmaqdır.
10.3. Forest Education Azerbaijan üçün ləpirçi olmaq təkcə iştirakçı olmaq deyil, təbiətə, insanlara və öyrənməyə hörmət edən bir yolun üzvü olmaq deməkdir.