QISA BİOQRAFİK MƏLUMAT
Dövlət idarəçiliyi, ictimaiyyətlə əlaqələr, layihə və kommunikasiya sahələrində 10 ildən artıq peşəkar təcrübəyə malik mütəxəssisdir. O, uzun illər dövlət sektorunda çalışaraq xidmət keyfiyyətinin artırılması, insan resursları ilə effektiv kommunikasiya, təlimlərin təşkili və ictimai əlaqələrin qurulması istiqamətlərində mühüm fəaliyyətlər həyata keçirmişdir. Narmin Ahmadova 2014–2020-ci illərdə “ASAN xidmət” sistemində məsul şəxs və baş məsləhətçi vəzifələrində çalışmışdır. Bu müddət ərzində xidmət keyfiyyətinə nəzarət, könüllülərin seçimi və təlimi, eləcə də vətəndaş məmnunluğunun artırılmasına yönəlmiş proseslərin icrasında aktiv rol oynamışdır. Hazırda Azərbaycan Respublikası Gənclər və İdman Nazirliyinin İctimaiyyətlə Əlaqələr şöbəsində baş məsləhətçi vəzifəsində fəaliyyət göstərir. O, rəsmi veb-sayt və sosial media idarəçiliyi, elektron xidmətlərin təşviqi, komanda daxili kommunikasiya və strateji PR fəaliyyətlərinin qurulmasına rəhbərlik edir. Eyni zamanda, Azərbaycan Respublikasının Prezidenti yanında Dövlət İdarəçilik Akademiyasının Davamlı İnkişaf Kafedrasında, Siyasi İdarəetmə fakültəsinin tələbələrinə “Davamlı İnkişaf siyasətində İctimaiyyətlə Əlaqələr” fənnindən dərs deyir. Mühazirələr zamanı tələbələrə Davamlı İnkişafın müasir standartlara uyğun şəkildə PR olunması, eləcə də dünyanın daha təmiz və dayanıqlı bir məkana çevrilməsi istiqamətində görülməli işlər barədə biliklər aşılayır. Narmin Ahmadova, həmçinin Azərbaycan Atıcılıq Federasiyasının üzvü olaraq, 10 metr məsafədən pnevmatik tapança ilə gülləatıcılığı idman növü üzrə peşəkar səviyyədə məşğul olur və reytinq sıralarında yer alır. O, ali təhsilini əvvəlcə Azərbaycan Dövlət Pedaqoji Universitetinin Tarix ixtisası, daha sonra isə Azərbaycan Respublikasının Prezidenti yanında Dövlət İdarəçilik Akademiyasının Dövlət və Bələdiyyə İdarəetməsi ixtisası üzrə tamamlamışdır. Beynəlxalq təcrübə qazanaraq ADA–LUISS Universitetində (Roma, İtaliya) Qlobal İdarəetmə və Siyasət üzrə magistr təhsili almış, dövlət idarəçiliyi və strateji qərarvermə sahəsində akademik biliklərini praktiki fəaliyyətlə uğurla birləşdirmişdir. Narmin Ahmadova dövlət və özəl sektor üçün kommunikasiya strategiyalarının hazırlanması, layihə idarəetməsi, effektiv ünsiyyət, komanda işi və ictimaiyyətlə əlaqələr sahələrində geniş praktik biliklərə malikdir. O, yerli və beynəlxalq təlim və sertifikat proqramlarında mütəmadi iştirak edərək peşəkar bacarıqlarını davamlı şəkildə inkişaf etdirir. Narmin Ahmadova Azərbaycan, ingilis, rus və türk dillərində peşəkar səviyyədə ünsiyyət qurmaq, həmçinin multidissiplinar komandalarla işləmək bacarığına malikdir.
