QISA BİOQRAFİK MƏLUMAT
O, maliyyə, pul tədavülü və kredit sahəsində tanınmış alim, iqtisad elmləri doktoru və professordur. Elnur Sadıqov həm Azərbaycan Respublikasında, həm də Rusiya Federasiyasında iqtisad elmləri doktoru elmi dərəcəsinə layiq görülmüşdür. Ali təhsilini Azərbaycan Xalq Təsərrüfatı İnstitutunda Maliyyə və kredit ixtisası üzrə almışdır. Doktorantura təhsilini Sankt Peterburq Dövlət Maliyyə-İqtisad Universitetində davam etdirmişdir. Onun fəlsəfə doktorluğu dissertasiyası “Kredit mexanizminin müasir dövrdə təkmilləşdirilməsi”, elmlər doktorluğu dissertasiyası isə “Azərbaycan Respublikasında fond bazarının bərpa edilməsi, müasir vəziyyəti və inkişaf perspektivləri” mövzularına həsr olunmuşdur. Elmi-pedaqoji fəaliyyətinə Azərbaycan Dövlət İqtisad Universitetində başlamış, Maliyyə və audit kafedrasında laborant, müəllim, baş müəllim, dosent və professor vəzifələrində çalışmışdır. Hazırda o, Rusiya Hökuməti yanında Maliyyə Universitetinin Sankt Peterburq filialında və Belarus Respublikasının Polotsk Dövlət Universitetində onlayn formatda professor kimi fəaliyyət göstərir. Professor Elnur Sadıqov bu günədək 10 fəlsəfə doktoruna və 1 elmlər doktoruna elmi rəhbərlik etmişdir. Onun elmi maraq dairəsi maliyyə bazarları, fond bazarı, bankçılıq sistemi, pul-kredit siyasəti, rəqəmsal iqtisadiyyat və elektron bankçılıq sahələrini əhatə edir. Elnur Sadıqov ictimai-siyasi fəaliyyətdə də fəaldır və Yeni Azərbaycan Partiyası İdarə Heyətinin üzvüdür. O, təhsilin və elmin inkişafındakı xidmətlərinə görə “Tərəqqi” medalı, “Qabaqcıl təhsil işçisi” döş nişanı, Belarus Respublikasının təhsil sahəsi üzrə döş nişanı və “Heydər Əliyevin 100 illiyi (1923–2023)” yubiley medalı ilə təltif olunmuşdur. Professor Elnur Sadıqov beynəlxalq elmi jurnalların redaksiya heyətinin üzvü kimi də fəaliyyət göstərir. O, Belarus Respublikasının Polotsk Dövlət Universitetinin “Vestnik” jurnalının və Polşada nəşr olunan “The Journal of Digital Politeconomics” jurnalının redaksiya heyətinin üzvüdür. Onun 110-dan artıq elmi əsəri dərc olunmuşdur. Bu əsərlər sırasında qiymətli kağızlar bazarı, bank əməliyyatları, fond bazarının inkişafı, rəqəmsal iqtisadiyyat, kriptovalyutalar və elektron bankçılıq mövzularında dərs vəsaitləri, monoqrafiyalar və beynəlxalq elmi məqalələr xüsusi yer tutur.
