QISA BİOQRAFİK MƏLUMAT
Uzun illərdir gənclərlə iş, sağlam həyat tərzinin təbliği, qeyri-formal təhsil, humanitar fəaliyyət, ictimai layihələrin idarə olunması və könüllülük hərəkatı sahələrində geniş təcrübəyə malik mütəxəssisdir. O, sosial məsuliyyət, insan sağlamlığı qorinması, ilk tibbi yardım , könüllü qan donorluğu, psixoloji dəstək və motivasiya eyni zamanda ictimai maarifləndirmə mövzularında layihələrin təşkili və icrasında rəhbər və icraçı rollarda çıxış etmişdir. Peşəkar fəaliyyəti çərçivəsində “Qan Donorları Assosiasiyası” İctimai Birliyində uzunmüddətli rəhbər vəzifələrdə çalışmış, 2007–2020-ci illərdə Assosiasiyanın İdarə Heyətinin sədri olmuşdur. Bu dövrdə gənc qan donorlarının təşkili, milli və beynəlxalq forumların keçirilməsi, ictimai kampaniyaların icrası və beynəlxalq əməkdaşlıqların qurulmasında fəal rol oynamışdır. Eyni zamanda müxtəlif illərdə layihə rəhbəri, mətbuat katibi və koordinator kimi fəaliyyət göstərmişdir. Fuad Əsgərov humanitar sahədə də aktiv fəaliyyət göstərmiş, müharibədən zərər çəkmiş şəxslərə psixoloji dəstək layihələrində iştirak etmiş, münaqişə dövründə itkin düşmüş şəxslərin axtarışı və məlumatların toplanması üzrə layihələrdə təmsil olunmuşdur. O, həmçinin beynəlxalq idman və mədəni tədbirlərdə təşkilati heyətin üzvü kimi çalışmış, böyükmiqyaslı tədbirlərin idarə edilməsində təcrübə qazanmışdır. Ali təhsilini Azərbaycan Avrasiya Universitetində jurnalistika ixtisası üzrə başa vurmuşdur. Peşəkar fəaliyyəti ilə yanaşı, təlimçi kimi gənclər üçün liderlik, könüllülük, komanda işi, layihələrin idarə edilməsi, ictimai ünsiyyət və sosial məsuliyyət mövzularında təlim və seminarlar keçmişdir. Beynəlxalq səviyyədə müxtəlif illərdə keçirilmiş forum, konfrans və təlim proqramlarında iştirak etmişdir. Fuad Əsgərovun iştirak etdiyi və təlim aldığı ölkələr bunlardır: Danimarka, Fransa, Niderland, İslandiya, Mərakeş, İtaliya, Litva, Almaniya, Gürcüstan, Portuqaliya, Hindistan, Nepal, Sloveniya və İndoneziya. Azərbaycan, rus və ingilis dillərində ünsiyyət və təlim aparmaq bacarığına malik olan Fuad Əsgərov qeyri-formal təhsil, ictimai fəallıq və gənclərlə iş sahəsində təlimçi və ekspert kimi fəaliyyətini davam etdirir.
