QISA BİOQRAFİK MƏLUMAT
Bədii yaradıcılıq, dekorativ tətbiqi sənət, STEAM yanaşmaları və qeyri-formal təhsil sahələrində uzunillik təcrübəyə malik təlimçi və pedaqoqdur. O, 2000-ci ildə Azərbaycan Dövlət Mədəniyyət və İncəsənət Universitetini dekorativ tətbiqi sənət (bədii metal, zərgərlik) ixtisası üzrə bitirmiş və 2002-ci ildən etibarən fasiləsiz olaraq təhsil və yaradıcılıq sahəsində fəaliyyət göstərir. Peşəkar fəaliyyəti çərçivəsində Uşaq İncəsənət Məktəbində Rəssamlıq Şöbəsinin müdiri, dərs hissə müdiri, 2012-ci ildən etibarən isə Milli Qəhrəman Mübariz İbrahimov adına Bağça–Məktəb–Lisey kompleksində bədii yaradıcılıq, rəssamlıq və texnologiya fənlərinin müəllimi kimi çalışmışdır. Eyni zamanda kompleks tədbirlərində quruluşçu rəssam, STEAM üzrə baş müəllim, 2019-cu ildən isə sosial iş və tyutor fəaliyyəti şöbəsinin müdiri (orta məktəblərdə tərbiyə işləri üzrə direktor müavini) kimi fəaliyyət göstərir. Ruslan Həsənov respublika səviyyəli bir sıra sərgilərin iştirakçısıdır. O, 2003-cü ildə “Narkomaniya əsrimizin bəlasıdır”, 2005-ci ildə “Antinarkotizm” mövzusunda karikatura sərgisi, 2006-cı ildə isə “Ümumrespublika plakat sərgisi”ndə iştirak etmişdir. 2002-ci ildən etibarən reklam və dizayn sahəsində, 2003–2006-cı illərdə isə rayon mədəniyyət evinin rəssamlıq emalatxanasında yaradıcılıq fəaliyyəti göstərmişdir. Təhsil mühitində innovativ yanaşmaları ilə seçilən Ruslan Həsənov liseydə fəaliyyəti dövründə “Tullantıdan məişətə” və “Qış bağı” kimi ekoloji və tətbiqi layihələrin müəllifi olmuşdur. O, interaktiv təlim texnologiyaları, rəqəmsal və STEAM əsaslı yanaşmalar üzrə çoxsaylı ixtisasartırma və beynəlxalq təlimlərdə iştirak etmişdir. 2014-cü ildən etibarən Azərbaycan Skaut Assosiasiyasının fəal üzvü, 2016-cı ildən isə Biləsuvar şəhəri üzrə müvəkkili kimi könüllü fəaliyyət göstərir. 2015-ci ildən bu günədək ölkə daxilində və beynəlxalq səviyyədə təlimçi kimi çıxış edir, WONDERLAND beynəlxalq skaut düşərgələrində hər il təlimçi qismində iştirak edir. Türkiyə və Belarusda təlimçi kimi fəaliyyət göstərmiş, müxtəlif beynəlxalq layihələr üzrə mütəmadi dəvətlər almışdır. Xarici təcrübəsi Türkiyə, İran, Gürcüstan, Rusiya və Belarus ölkələrini əhatə edir. Ruslan Həsənov STEAM, ebru sənəti, dekorativ tətbiqi sənət, rəssamlıq, skautinq və tullantılardan yaradıcılıq istiqamətlərində təlimçi kimi fəaliyyətini davam etdirir.
