QISA BİOQRAFİK MƏLUMAT
20 ildən artıq peşəkar iş təcrübəsinə malik olmaqla, fəaliyyətinin əsas istiqamətini uşaqların və gənclərin təlimləndirilməsi, maarifləndirilməsi, cəmiyyətə inteqrasiyası və onların bir fərd kimi sağlam şəkildə formalaşmasına dəstək göstərilməsi üzərində qurmuşdur. Peşəkar fəaliyyətinə Azərbaycan dili və ədəbiyyatı müəllimi kimi başlamış, illər ərzində təhsil, sosial inklüzivlik və icma əsaslı inkişaf sahələrində dərin praktiki təcrübə qazanmışdır. Müəllimlik fəaliyyəti ilə paralel olaraq İcma Əsaslı Reabilitasiya Mərkəzində fiziki məhdudiyyətli uşaqlar və gənclər (0–18 yaş), eləcə də onların valideynləri üçün təlim və seminarlar keçirmişdir. Bu təlimlər əsasən uşaqların təhsilə cəlb olunması, valideynlərin maarifləndirilməsi, hüquq və səlahiyyətlər barədə məlumatlandırılması və inklüziv yanaşmaların təşviqinə yönəlmişdir. Yerli qurumlarla – poliklinikalar və DSMF ilə əməkdaşlıq çərçivəsində regionlarda “Erkən müdaxilə” (0–3 yaş) proqramı üzrə təlimlərin təşkili və icrasında iştirak etmişdir. Sözügedən proqramlar inkişaf ləngimələrinin və risklərinin erkən mərhələdə aşkarlanması, mövcud geriliklərin minimuma endirilməsi və uşaqların inkişaf potensialının gücləndirilməsi yolu ilə onların gələcəkdə daha müstəqil həyat sürməsinə şərait yaratmağı hədəfləmişdir. Peşəkar fəaliyyətinin növbəti mərhələsində “Azərbaycan Dəmir Yolları” QSC-nin Dəmir Yolu Muzeyində rəhbər vəzifədə çalışdığı dövrdə məktəblilər və tələbələr üçün çoxsaylı maarifləndirici təlimlər, interaktiv sessiyalar və foto müsabiqələr təşkil etmişdir. Gənclərin peşəyönümlü ixtisaslara marağının artırılması məqsədilə “Dəmir yollarının tarixi”, “Dəmir yollarının həyatımızdakı rolu”, “Mən dəmiryolçuyam” mövzularında silsilə təlimlər həyata keçirmişdir. Bununla yanaşı, COP29 layihəsi çərçivəsində koordinatorlar və könüllülər üçün “işçilərin rolları üzrə təqdimat strukturu” mövzusunda təlimlərin təşkili və keçirilməsində iştirak etmişdir. Təlimçilik fəaliyyətində inklüzivlik, maarifləndirmə, erkən müdaxilə, peşəyönümü və sosial məsuliyyət prinsiplərini əsas götürən Nəzakət Əliyeva qeyri-formal təhsil metodlarını praktiki şəkildə tətbiq edən təcrübəli mütəxəssisdir.
