Daşkəsən məktəblərində skaut metodu ilə qeyri-formal təhsilin təşviqi layihəsinin açılış tədbiri keçirilib
Daşkəsən rayonunda “Daşkəsən məktəblərində skaut metodu ilə qeyri-formal təhsilin təşviqi” qrant layihəsi çərçivəsində açılış tədbiri təşkil olunub. Tədbirdə məktəb rəhbərliyi, müəllimlər, şagirdlər və layihə icraçıları iştirak ediblər. Açılış zamanı layihənin məqsədləri, fəaliyyət istiqamətləri və gözlənilən nəticələr barədə ətraflı məlumat verilib.
Layihənin əsas məqsədi məktəblilərin sosial bacarıqlarının inkişaf etdirilməsi, komanda işi vərdişlərinin gücləndirilməsi və liderlik keyfiyyətlərinin formalaşdırılmasıdır. Bu məqsədlə skaut metoduna əsaslanan qeyri-formal təhsil yanaşmalarının məktəb mühitinə inteqrasiyası nəzərdə tutulur. Layihə çərçivəsində şagirdlər açıq hava fəaliyyətləri, praktiki öyrənmə tapşırıqları, interaktiv oyunlar, qrup işləri və problem-həlli yönümlü məşğələlər vasitəsilə fəal təlim prosesinə cəlb olunacaqlar.
Tədbirdə vurğulanıb ki, skaut metodu uşaqların yalnız akademik biliklərinin deyil, eyni zamanda məsuliyyət hissinin, təşəbbüskarlığının, ünsiyyət bacarıqlarının və özünəinamının inkişafına xidmət edir. Bu yanaşma şagirdlərin məktəb həyatında daha aktiv iştirakını təmin etməklə yanaşı, onların real həyat bacarıqlarını da gücləndirir. Layihə yalnız şagirdlərlə məhdudlaşmır. Eyni zamanda müəllimlər üçün skaut metodunun tədris prosesinə inteqrasiyası ilə bağlı təlimlərin keçirilməsi planlaşdırılır. Bu təlimlər vasitəsilə pedaqoqlara qeyri-formal təhsil metodlarının dərs prosesində tətbiqi, interaktiv və şagirdyönümlü yanaşmaların təşviqi ilə bağlı praktiki bilik və bacarıqlar aşılanacaq. Məqsəd məktəbdə öyrənmə mühitini daha maraqlı, çevik və effektiv etməkdir.
Qeyd edək ki, “Daşkəsən məktəblərində skaut metodu ilə qeyri-formal təhsilin təşviqi” qrant layihəsi Zamin Məmmədov tərəfindən Daşkəsən rayonu Anar Mürsəlov adına tam orta məktəbdə həyata keçirilir. Layihə şagirdlərin məktəb mühitində daha fəal, yaradıcı və təcrübəyə əsaslanan öyrənmə prosesinə cəlb olunmasına yönəlib və yerli icma üçün innovativ təhsil modeli kimi qiymətləndirilir.
Sonda qeyd etmək istərdik ki, Forest Education Azerbaijan bu kimi qeyri-formal təhsil təşəbbüslərini, xüsusilə skaut metoduna əsaslanan və uşaqların hərtərəfli inkişafına xidmət edən layihələri alqışlayır və belə təşəbbüslərin regionlarda təhsilin keyfiyyətinin yüksəldilməsinə mühüm töhfə verdiyini vurğulayır.
